Dos inicios da antiga diplomatura en Xestión e Administración Pública, no curso 1999/2000, á experiencia do primeiro grao do Sistema Universitario de Galicia (SUG) en contar cunha modalidade virtual. Editado polo Servizo de Publicacións da UVigo, o libro Aprendendo a xestionar o público percorre os 25 anos de traxectoria destes estudos na institución viguesa, a través dunha “reflexión compartida sobre un proxecto educativo híbrido”, que ten na innovación docente o seu fío condutor. Coordinado por Enrique Varela e Xosé Mahou, decano e vicedecano da Facultade de Dirección e Xestión Pública, esta monografía reúne as achegas dunha ducia de docentes deste centro, que abordan a situación destes estudos en España e Galicia, a coordinación académica das titulacións virtuais e diferentes iniciativas en materia de innovación docente levadas a cabo nesta facultade.
“Supón facer explícito un relato sobre os estudos de dirección, xestión e administración pública que impulsamos desde o curso 1999/2000”, sinala Varela dunha publicación que nace “como resultado de moitas experiencias colectivas”. Estas, lembra, abranguen tanto o Grao en Dirección e Xestión Pública e o mestrado virtual en Dirección Pública e Liderado Institucional, impulsado no curso 2011/2022, como a propia constitución, en 2022, da facultade á que se adscriben estes dous títulos. De feito, Dirección e Xestión Pública conmemoraba o pasado curso cun conxunto de actividades, os 25 anos de traxectoria destes estudos na UVigo, nos que agora afonda tamén esta publicación.
Recentes directivas da Unión Europea buscan impulsar nos diferentes estados membros a creación de comunidades enerxéticas, entidades xurídicas compostas por cidadáns, pequenas empresas ou administracións que xestionan e consumen a súa propia enerxía renovable. Supoñen, como recoñece o investigador da Facultade de Dirección e Xestión Pública Santiago Salvador, un “cambio de paradigma no sector eléctrico” e unha oportunidade para o impulso de “pequenos proxectos de autoconsumo colectivo” que poderían xogar un papel relevante fronte ao “reto demográfico”, contribuíndo ao “desenvolvemento de actividades, servizos e tecido industrial” en zonas rurais. Esta idea constitúe un dos puntos de partida dun estudo coordinado por este investigador do grupo AGAF, que aborda desde un punto de vista xurídico “os desafíos que enfrontan as administracións locais” á hora de promover o impulso destas comunidades enerxéticas.
Desenvolvido ao abeiro dunha liña de axudas da Deputación de Pontevedra para o fomento de iniciativas investigadoras, este proxecto tiña como obxectivo analizar os “instrumentos político-normativos” dos que dispoñen as administracións locais para facilitar a creación das comunidades enerxéticas e para “implantar cláusulas ambientais e sociais nos seus procesos de contratación”. Desenvolvido por Salvador Gimeno, Patricia Valcárcel, Rafael Fernández Acevedo, Juan Antonio Hernández Corchete e Rosa Ricoy, o proxecto abordou tamén “a controversia derivada da afección” da enerxía eólica mariña sobre as comunidades locais costeiras. Partindo nese senso do “impacto socioeconómico” que os “grandes proxectos de enerxía renovable” poden ter a escala local, este traballo buscaba identificar oportunidades para involucrar á poboación local na produción dunha “enerxía limpa” e deu lugar á recente publicación de dous estudos en dous libros editados por Aranzadi.
No marco do programa La Administración Cerca de Ti, que a Subdelegación de Goberno coordina na provincia de Pontevedra, persoal técnico deste organismo e da Tesourería da Seguridad Social protagonizaron este luns unha sesión formativa sobre administración electrónica na Facultade de Dirección e Xestión Pública. Da man de Margarita Hortas, da Subdelegación do Goberno, esta actividade achegou ao alumnado “ás distintas opcións de identidade electrónica”, como o DNI e o certificado electrónico ou o sistema Cl@ve, así como á Carpeta Ciudadana, “unha aplicación na que temos localizados nun único sitio todos os datos que a Administración ten sobre un cidadán”. Ademais, Dolores López amosou o alumnado o funcionamento da oficina virtual da Tesourería da Seguridad Social.
Inserida nas actividades da materia Ciencia da administración e xestión pública, esta xornada contou coa participación do subdelegado do Goberno en Pontevedra, Abel Losada, e do decano da facultade, Enrique Varela. Como destacaron desde a Subdelegación, La Administración Cerca de Ti é un programa que se está a desenvolver en diferentes concellos rurais, co obxectivo de chegar a unha poboación que poida ter máis dificultades no uso das tecnoloxías á hora de relacionarse coas administracións públicas. Ademais, lévano tamén a cabo con outro tipo de colectivos, como é neste caso o estudantado universitario. Non en van, como apuntou Hortas, “parece que a xente nova sempre está á marxe da fenda dixital, porque viven con móbil na man”, mais esta si que existe “á hora de enfrontarse ás sedes electrónicas”. Nesa mesma liña, Varela puxo en valor o necesario desta formación e o “esforzo en relación coa transferencia do coñecemento” que se leva a cabo desde a Administración Xeral do Estado.
Organizacións similares en termos de persoal e de recursos poden xestionar os servizos públicos dun xeito moi diferente, en boa medida, por mor do papel que poidan desenvolver os directivos e directivas públicos. Esta é unha das ideas que os investigadores do grupo de investigación Observatorio da Gobernanza G3 poñen de relevo nun libro sobre a dirección pública profesional, que reúne as achegas dunha trintena de investigadores, académicos e directivos e directivas públicos. Dirixido a afondar no papel que estas figuras poden xogar na modernización administrativa, os investigadores da Facultade de Dirección e Xestión Pública Óscar Briones, Xosé Mahou e Enrique Varela achegan dous estudos a este volume, centrados nas competencias e no ciclo de vida do persoal directivo e no seu papel á hora de promover unha “aprendizaxe institucional” dentro da organización.
Editado por Aranzadi, o libro La dirección pública profesional: evaluación, selección y desempeño de los directivos públicos “reúne os maiores especialistas no eido da visión politécnica sobre os retos actuais do desenvolvemento da profesionalización do exercicio da dirección pública nas administracións españolas”, sinala Varela, coordinador do Observatorio da Gobernanza. Este volume analiza o papel dos directivos e directivas públicos na modernización administrativa “desde unha visión integral, diferenciando a dirección pública profesional da dirección política e definindo os seus requisitos, experiencia, formación e certificación”, segundo recolle o seu texto de presentación.
Achegar o alumnado de Dirección e Xestión Pública as múltiples posibilidades profesionais da Administración Xeral do Estado foi o obxectivo central da xornada desenvolvida este luns nesta facultade, no marco das actividades do programa EmpregoinCampus, promovidas pola Vicerreitoría do campus e a Vicerreitoría de Estudantado e Empregabilidade, co financiamento do Consello Social da Universidade de Vigo. Coa participación de representantes da Dirección Xeral de Función Pública do Goberno central, da Axencia Tributaria e do Catastro, esta xornada buscou tanto darlles unha “visión xeral” dos diferentes corpos de funcionarios e funcionarias existentes na administración central como “intentar eliminar” unha serie de “tópicos” ligados ao emprego público, segundo salientou Sonia Postigo, vogal asesora da Dirección Xeral de Función Pública.
Presentada polo decano, Enrique Varela, a xornada contou coas intervencións desta representante do Ministerio para a Transformación Dixital e Función Pública; da xerenta do Catastro en Pontevedra, Micaela Martínez; do delegado da Axencia Estatal para a Administración Tributaria (AEAT) en Pontevedra, Daniel Gómez, e da directora da Área de Emprego e Emprendemento da UVigo, Maruxa Álvarez. Baixo o título de Xornada de Captación de Talento, este encontro insírese nunha serie de iniciativas dirixidas a conectar o alumnado coa realidade profesional de diversos sectores que ao longo deste 2025 se desenvolven nas diferentes facultades e escolas do campus.
Promovida pola Asociación das Traídas de Auga (Coxapo), a Conferencia Internacional Acowas-EU reúne nestes días en Pontevedra especialistas, persoal técnico e representantes institucionais de Austria, Irlanda, España, Dinamarca e Finlandia, co obxectivo de abordar os retos da xestión comunitaria da auga potable en zonas rurais. Tras desenvolver este martes a súa xornada inaugural no Teatro Principal, o congreso trasladouse este mércores á Facultade de Dirección e Xestión Pública, onde tiveron lugar diferentes mesas de traballo dirixidas a promover unha reflexión sobre estes sistemas de abastecemento autoxestionados e a súa regulación, así como a compartir boas prácticas desenvolvidas en diferentes países.
Inaugurada polo decano, Enrique Varela, e o deputado provincial Javier Tourís, esta xornada abrangueu tanto sesións de debate como de tres mesas de traballo simultáneas, dirixidas a reunir as perspectivas de asociacións, administracións e persoal investigador. Nunha destas xuntanzas participaron responsables das asociacións integrantes de Acowas-EU de varios países, mentres que outro dos encontros xuntou representantes da Consellería de Sanidade, de Augas de Galicia, da Confederación Hidrográfica Miño-Sil, da Deputación de Pontevedra e dos concellos de Abegondo, Ponteareas e Tomiño. Finalmente, a mesa de traballo das universidades contou coas intervencións de Enrique Varela, coordinador do grupo de investigación Observatorio da Gobernanza G3; da profesora da Universidade da Coruña Acacia Nieves; do investigador da Universidade de Boku (Austria) Reinhard Pefer; da directora do Centro de Estudos da Auga do Instituto Dundalk de Tecnoloxía (Irlanda), Suzanne Linnare; do técnico da ONG Enxeñeiros sen Fronteiras Sergio Fernández e da investigadora predoutoral da UVigo Paula Díaz.